औरंगाबाद /प्रतिनिधी
औरंगाबाद शहरात शहानूर मियाँ दर्गाहजवळील रेल्वे रूळाच्या पलीकडे असलेल्या पीडब्ल्यूडी कॉलनी येथून एका बांधकाम ठेकेदाराच्या २८ वर्षीय भावाचे अज्ञात आरोपीनी अपहरण केले. पिस्तुलातून गोळीबार करून तरुणाचे अपहरण केले. ही घटना बुधवारी (४ नोव्हेंबर) घडली. गोळीबाराच्या आवाजाने परिसरात दहशत निर्माण झाली होती. अपहरण करण्यात आलेल्या तरुणाचे नाव नाझीम पठाण (वय २८, रा. हुसैन कॉलनी) असे आहे.या प्रकरणात काही प्रत्यक्षदर्शी यांनी दिलेल्या माहितीनुसार, पीडब्ल्यूडी कॉलनी येथे मदन अवधुत भोसले यांच्या घराचे काम सुरू होते. या घराचे बांधकाम करणाऱ्या ठेकेदाराचा भाऊ नाजीम रऊफ पठाण हा कामगारांसोबत काम सुरू करत होता. साडेअकरा वाजताच्या सुमारास कॉलनीमध्ये प्रवेश करणाऱ्या मोकळ्या जागेवर एक कार येऊन थांबली. या कारमधून दोन जण खाली उतरले. त्यांच्या तोंडावर मास्क लावलेले होते. नाजीम या लोकांना भेटण्यासाठी कारपर्यंत गेला. एका मास्क लावलेल्या व्यक्तीने पिस्तूल काढून हवेत गोळीबार केला. तसेच काही समजण्याच्या आत नाजीमला कारमध्ये जबरदस्ती बसवले. काही क्षणांतच ही कार कॉलनीतून मुख्य रस्त्याकडे वेगाने नेली.या घटनेची माहिती सातारा पोलिसांना मिळताच, सातारा पोलीस ठाण्याचे पोलीस निरिक्षक सुरेंद्र माळाळे हे घटनास्थळी पोहोचले. त्यांनी घटनेची माहिती घेतली. या अपहरण प्रकरणात सातारा पोलीस ठाण्यातील दोन पथके स्थापन करण्यात आली. या प्रकरणात नाजीम पठाण याचा भाऊ वसीम रऊफ पठाण याच्या फिर्यादीवरून सातारा पोलीस ठाण्यात गुन्हा दाखल करण्यात आला आहे.या अपहरण प्रकरणात सातारा पोलिसांनी ज्या कारमधून अपहरण झाले, त्या कारचे लोकेशन तपासले. ही कार भालगाव येथे असल्याची माहिती पोलिसांना मिळाली. या माहितीनंतर एक पथक भालगावकडे पाठवण्यात आले.या प्रकरणात पोलिसांनी दिलेल्या माहितीनुसार, हे अपहरण पैशांच्या वादातून झाल्याची प्राथमिक माहिती समोर येत आहे. नाजीम पठाण याच्या ओळखीच्याच लोकांनी त्याचे अपहरण केले असावे, असा प्राथमिक अंदाज पोलिसांनी व्यक्त केला आहे.दरम्यान, चित्ते पिंपळगाव येथे अपहरणकर्त्यांच्या कारमधील डिझेल संपले. डिझेल संपल्यानंतर अपहरणकर्त्यांनी तरुणाच्या पायावर गोळी झाडली. त्यानंतर चौघे जण पसार झाले. पोलीस चित्ते पिंपळगाव येथे पोहोचले. त्यांनी तरुणाला जखमी अवस्थेत घाटी रूग्णालयात दाखल केले आहे.

Leave a Reply

Your email address will not be published. Required fields are marked *