विशेष संपादकीय

गांजा युक्त्त शिवार योजना

मोदींच्या नव्या कृषी विधेयकांनी भारतीय शेतीचा शाश्वत विकास होईल न होईल.शेतकरी आत्मनिर्भर होईल न होईल.किंवा विरोधक म्हणतात त्या प्रमाणे लुटला जाऊन बरबाद होईल.ते पाहता येईल,किंवा दिसेलच.भले होईल की बुरे माहित नाही.समजा भले झाले तर आता काय वाईट आहे ? आणि बुरे झाले तर आता कोणते अच्छे दिन आहेत ? परवा कंगना राणावत मोदींच्या कृषी विधेयकाला विरोध करणारे देशद्रोही असल्याचे म्हणाली.नशीब शेतकरी सुद्धा ड्रग्ज घेतात,शेती धंद्यातही महिलांचे लैंगिक शोषण होते वगैरे म्हणाली नाही.शेतकरी अफू-गांजाची नशा करतात की नाही ते माहिती नाही,पण अफू-गांजा पिकवतात याचे पुरावे समोर आले आहेत.दोन वर्षांपूर्वी बीड जिल्ह्यातल्या परळीत काही शेतकऱ्यांनी चक्क अफूची शेती सुरु केल्याचे उघडकीस आले होते,आता नुकतेच हिंगोली जिल्ह्यात काही शेतकऱ्यांनी गांजा पिकवल्याचे निदर्शनात आले.शेतकऱ्यांनीच शेतकऱ्यांची टीप दिली आणि पोलिसांनी कारवाई केली.पण ही अफूची म्हणा किंवा गांजाची शेती करण्याची अवदसा शेतकऱ्यांना का सुचावी ? किंबहुना ही वेळ त्यांच्यावर का यावी ? शेतमालापेक्षा गांजा आणि अफूचे मार्केट नेहमीच तेजीत असते.दुष्काळ,गारपीट,अतिवृष्टी,नापिकी यापैकी कशाचाही या ‘माला’वर दुष्परिणाम होत नाही .त्याला कीड लागत नाही,खत-फवारणीची गरज नाही, दुबार पेरणीचे संकट नाही,हमीभाव,पीक कर्ज,पीक विमा,शेतकरी सन्मान असल्या भिकार दळभद्री योजनांची गरज नाही,दोन हजाराची चार चार चकरा आणि दिवसभर उपाशी पोटी उन्हातान्हात आधी ऑनलाईन अर्ज भरायला आणि नंतर पुन्हा पैसे काढायला रांगेत उभे राहण्याची गरज नाही.भावासाठी आंदोलन करण्याची गरज नाही.दीडपट-बिडपट असल्या यडपट-खुळचट बाजारगप्पा मारण्याची गरज नाही.माल तयार होतो ना होतो तरच नुसत्या वासाने गिऱ्हाईक दारात.तोंड मागितले दाम.पुन्हा माल नाशवंत नाही.सडला तरी तेवढ्याच किंवा जादा-दामदुप्पट भावाने विकतो.आता इतकं सगळं चुन्यानं उखळ पांढरं होतंय म्हटल्यावर कोण त्या मोहाला बळी पडणार नाही ? गांजा-अफू पिकवणे गुन्हा आहे,का तर त्यापासून अमलीपदार्थ बनतात.या हिशेबाने मग ऊस-द्राक्षे पिकवायला पण बंदी घालायला पाहिजे,कारण त्यापासून पण दारू बनते.अगदी ज्वारी,बाजरी,डाळिंब,जांभूळ,मोसंबी,संत्र,खजूर या पासूनही दारू-बिअर-वाईन बनते.काजू पासून फेणी बनते.मोहांच्या फुलांचीही दारू बनते. गांजा-अफूला बंदी असेल तर या पिकांनाही बंदी घालायला पाहिजे.तंबाखू पिकवायलाही बंदी घालायला पाहिजे,गांजा-अफूने तरी माणसे नुसती ढळतात,तंबाखूने तर कँसर होतो.माणूस मरतो.दारूने लिव्हर खराब होऊन माणूस मरतो.थोडक्यात म्हसोबा बदनाम असेल तर मरीआई सुद्धा बदनाम पाहिजे.नाहीतर मग दोघांची पण जत्रा सुरु राहिली पाहिजे,बहुतेक हा बंडखोर विचार डोक्यात घेऊनच मराठवाड्यातल्या परळी-हिंगोलीतल्या शेतकऱ्यांनी अफू-गांज्याची शेती पिकवली असावी.पोलिसांनी त्यांना पकडले,त्यांनी त्यांचे काम केले.कायद्याने बंदी असलेले काही पिकवता येणार नाही हे खरेच.पण आजकाल देशात सगळीकडे गांजा-ड्रग्जची चर्चा सुरु असल्याने,कदाचित नशा मार्केट मध्ये या मालाचे भाव वधारले असण्याची शक्यता आहे.मालाला मागणी वाढल्याने काही शेतकऱ्यांनी दगड टाकून पहिला.तो त्यांच्याच पायावर पडला.अर्थात यात जे पकडले ते चोर आणि पळाले ते साव असा प्रकार आहेच.मूळ पिकात लपून छपून अफू-गांजा लावणे-वाढवणे,तो विकणे,त्याची तस्करी हा प्रकार नवा नाही.त्यात कमी कष्ट-मेहनतीत बक्कळ पैसा मिळत असल्याने काही शेतकऱ्यांना हा दोन नंबरचा धंदा करण्याचा मोह होतो.पण ही फसवी दरी आहे.कायद्याने गुन्हा आहे.सगळे नशेत असले तरी शेतकऱ्यांनी भानावर राहिले पाहिजे.

ReplyForward